Паводле Міністэрства энэргетыкі, сытуацыя штатная і пагрозы няма.
▪️ Радыяцыйны фон не зьмяніўся.
▪️ Спажыўцы атрымліваюць электрычнасьць безь перабояў.
Цяпер абсталяваньне правяраюць, каб аднавіць працу.
Пакуль немагчыма незалежна праверыць паведамленьне аб інцыдэнце і ўзроўні радыяцыі.
У Літве адрэагавалі на аварыйнае адключэньне
У Цэнтры радыяцыйнай бясьпекі Літвы заявілі, што беларускі бок не інфармаваў Літву аб інцыдэнце, але зьменаў у стане радыяцыйнага фону пакуль не назіраюць.
«Мы праводзім маніторынг, радыялягічнае назіраньне за навакольлем. На сёньня ўсе нашы станцыі працуюць, сувязь зь імі стабільная і фон не зьмяніўся. Аэразольныя станцыі таксама не зафіксавалі ніякіх адхіленьняў. Паказьнікі фону сьведчаць аб браку зьменаў, выкідаў у навакольле няма — прынамсі, яны не дасягнулі Літвы», — паведаміў у этэры Радыё LRT кіраўнік дэпартамэнту экспэртызы і кантролю апраменьваньня Цэнтру радыяцыйнай бясьпекі Юлюс Жылюкас.
Паводле яго, у выпадку інцыдэнту і пры ўмове, што вецер у кірунку Літвы, радыяактыўнае забруджваньне магло б дасягнуць дзяржаўнай мяжы за гадзіну, а Вільні — прыкладна за тры гадзіны.
«Калі вецер будзе строга ў бок Літвы, забруджваньне можа быць зафіксавана», — дадаў ён.
Прадстаўнік Цэнтру радыяцыйнай бясьпекі Літвы падкрэсьліў, што ведамства не атрымлівала ніякай інфармацыі зь беларускага боку.
«Мы не атрымалі ніякага сыгналу, інфармацыю маем з СМІ. Наколькі ведаем з гэтага ж паведамленьня — няма гаворкі пра парушэньні ў ядзернай частцы», — патлумачыў Жылюкас.
Адключэньне энэргаблёкаў на Беларускай АЭС адбываецца часта. У сьнежні 2024 году быў пэрыяд, калі абодва блёкі станцыі былі адключаныя. Другі энэргаблёк БелАЭС часова адключылі ад сеткі праз рэакцыю аднаго з сэнсараў, паведаміла 19 сьнежня прэс-служба Міністэрства энэргетыкі Беларусі. Першы энэргаблёк 3 сьнежня вывелі ў трэці плянава-папераджальны рамонт і яго ўключылі толькі ў канцы студзеня 2025 году.
- Будаўніцтва БелАЭС завяршылася восеньню 2023 году. Першы энэргаблёк станцыі сілкуе энэргасыстэму Беларусі з 3 лістапада 2020 году, другі — з 13 траўня 2023 году. У прамысловую эксплюатацыю іх увялі ў чэрвені 2021 і лістападзе 2023 году адпаведна.
- Першы энэргаблёк БелАЭС ужо прайшоў два плянава-папераджальныя рамонты. У 2022 годзе ён спыняўся для рамонту на 198 дзён, у 2023-м — на 68 дзён.
- Другі энэргаблёк Беларускай АЭС апошні раз спынялі на плянавы рамонт у ліпені 2024 году. Паведамлялася, што падчас работ правядуць дэталёвую дыягностыку ўсіх сыстэмаў, а таксама заменяць адпрацаванае ядзернае паліва на сьвежае. 14 кастрычніка другі энэргаблёк БелАЭС уключылі ў сетку.
- Пры штатнай працы двух энэргаблёкаў БелАЭС забясьпечвае каля 40% патрэбаў Беларусі ў электраэнэргіі.
Што варта ведаць пра БелАЭС
- Беларуская АЭС ад 2011 году ўзводзілі пад Астраўцом, што ў Горадзенскай вобласьці, за 22 км ад мяжы зь Літвой, за 50 км ад Вільні і за 125 км ад Менску.
- Тэрміны запуску некалькі разоў пераносілі. Першапачаткова запуск плянаваўся на 2018 год, Лукашэнка пазьней заяўляў, што тэрміны сарвала Расея. Урэшце цырымонія запуску АЭС прайшла 7 лістапада 2020 году.
- Для будаўніцтва абраны праект АЭС-2006 — тыповы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту збудаваныя блёкі Новаваронескай АЭС і Ленінградзкай АЭС-2, што працуюць у Расеі.
- БелАЭС будуе расейская дзяржаўная кампанія «Росатом» за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу АЭС у эксплюатацыю, але не пазьней за 1 красавіка 2021 году. Беларусь папрасіла Расею падоўжыць крэдыт на 10 гадоў.
- На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. Праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
- Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычын, каб не будаваць БелАЭС, абвінавачвала беларускія ўлады ва ўтойваньні інфармацыі пра станцыю. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
- Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
- Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць толькі пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
- Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.
- У сакавіку 2023 літоўская выведка заявіла, што Беларусь і «Росатом» у мінулым годзе схавалі інцыдэнты і дэфэкты ў рэактарных сыстэмах на першым і другім энэргаблёках. У Міністэрстве энэргетыкі Беларусі адпрэчылі абвінавачаньні і заявілі, што такі даклад ёсьць «мэтанакіраванай акцыяй па дыскрэдытацыі БелАЭС».
- Паводле словаў фізыка-атамніка Андрэя Ажароўскага, спыніць станцыю зараз будзе вельмі дорага. Пры гэтым ён схільны давяраць паведамленьням літоўскай выведкі. Шэраг ускосных прыкметаў сьведчыць аб тым, што на Астравецкай АЭС дзясяткі тысяч недаробак.
- Ад пачатку працы АЭС у Беларусі і на пачатак лістападу 2023 электрычнасьць падаражэла на 21–22% у залежнасьці ад тарыфу.
- Першы энэргаблёк АЭС сілкуе энэргасыстэму Беларусі з 3 лістапада 2020 году (прамыслова эксплюатуецца з чэрвеня 2021), другі — з 13 траўня 2023 году.
- З 26 ліпеня другі блёк АЭС спынілі дзеля рамонту, які назвалі плянавым. Ранейшыя рамонты на доўгія месяцы спынялі працу станцыі. Першы блёк БелАЭС ужо прайшоў два плянава-папераджальныя рамонты. У 2022 годзе ён спыняўся для гэтых мэтаў на 198 дзён, у 2023-м — на 68 дзён.
- У жніўні новым міністрам энэргетыкі замест Віктара Каранкевіча стаў Аляксей Кушнарэнка. А былога намесьніка Каранкевіча Міхаіла Міхадзюка, які непасрэдна кантраляваў АЭС, у гэтым жа месяцы пачалі судзіць за атрыманьне хабару.
- 26 жніўня намесьнік міністра энэргетыкі Дзяніс Мароз заявіў пра падрыхтоўку ведамствам справаздачы перад урадам аб мэтазгоднасьці пабудовы другой АЭС.
Форум